Hitzez Emakume Baserritarren Elkartetik Mutrikun elkartu gara, zolda-belarraren inguruko ezagutzak elkarbanatzeko eta gure arteko sarea indartzen jarraitzeko.
Joan den apirilaren 21ean, elkarteko kideok Mutrikuko Ondarro elkartean batu ginen, giro hurbil eta parte-hartzailean. Oraingoan, zolda-belarrari buruzko azalpenak jaso genituen, Arantxa Eizmendiren eskutik.
Arantxak, zolda-belarraren inguruko ezagutzak partekatu zituen gurekin: ezaugarriak, non aurki daitekeen, nola bereizi eta erabilera tradizionalei buruzko hainbat xehetasun eman zizkigun. Baserri-giroan eta herri-medikuntzan landareek izan duten garrantziaz hitz egiteko aukera ere izan genuen, belaunaldiz belaunaldi transmititu diren jakintzak gogora ekarriz.
Saioa oso aberasgarria izan zen, ez soilik jasotako azalpenengatik, baita emakumeon artean sortu zen solasaldiari esker ere. Izan ere, horrelako topaketek aukera ematen digute esperientziak trukatzeko, elkarri entzuteko eta landa-eremuarekin lotutako jakintza txiki baina baliotsuak mahai gainean jartzeko.
Hitzezetik uste dugu emakume baserritarren arteko topagune hauek ezinbestekoak direla. Gure arteko harremanak sendotzeko, herri-jakintza bizirik mantentzeko eta lehen sektoreko ezagutzak hedatzeko espazioak sortzen jarraitzea da gure helburua.
Mutrikuko saioak argi utzi zigun, berriro ere, gure artean badagoela zer kontatua, zer ikasia eta zer partekatua.
